Vor zen djar habar ågeheft zo lesa bazda schraibet dar Andrea Golo attn “Dar Fòldjo” von Kamòu vo Lusérn. Khurtze stördjela boda però håm gevàllt alln, in djungen un in altn, sin zo riva in di hent von Mario Rigoni Stern boden hatt geschribet a schümmana lettar zo lega darzùar in libar “Guardiano di stelle e di vacche”, boda, spetar, iz khent auzgedrukht pittar “Biblioteca dell’Immagine”, nicht mindar baz di editrìtsche von Mauro Corona.
Hèrta pitt seåndre, vor a par djar, hattar auzgedrukht di stòrdja “Diritto di memoria” un pinn sèll hattarse gemacht khennen no mearar von laüt boda schraim un boda lesan.
Di lestn månat von djar pasàrt, pitt “Di roccia di neve di piombo”, soin lest libar auzgedrukht pitt “Priuli & Verlucca”, izzar inngetretet in di bèlt von “djüstn schraibar”. Vo imen håmsa geschribet bobràll, aftn djornàl “l’Adige” un aftn “Trentino”, aftn “La Stampa” un aftn “Repubblica”. Da rüavanen zo reda in di bichtegarstn boténg boda vorkhoavan libadar, nètt lai ka Tria ma in gåntz Obar Beleschlånt, ena zo reda von bibliotèke un von schualn. 
Da izzar guat zo halta stille zo lüsnanen, saiz studéntn vo sintza, achtza djar, azpe khindar von schualn elementàri, vor gåntze urn.
Sichar dar Andrea, bizen ånka håm sa darkhennt bichtege gebìnn vor soine libadar, izzen nètt impìtet zo riva in di lestn vünve atz gebìnn “Premio ITAS del Libro di Montagna 2017”. Sa ditza iz eppaz vil, vor an schraibar, ma an lestn izzar khent senjalàrt von praiz, lai nå in libar boda hatt gebùnnt, “Le otto montagne” Einaudi, von groaz schraibar Paolo Cognetti.
Beh, rivan lai nå alz zboate in an schraibar boda khint übarsetzt in mearar alz viartzekh zungen, iz eppaz bichte genùmma.
Lai zo gedenkha bazzez iz dar “Premio Itas del Libro di Montagna”, khöbaraz ke haür soinda gest 122 libadar, zuargerift vo 70 “Case editrici”.
Kesà azza alle atz Lusérn bizzan zo haba a mentsch asó gekhennt un, übarhaupt, gelest, biar bartnen vorsan zo kheara bidar da in lånt zo reda von libar, vor di sèllnen boda nètt håm gemak khemmen in ditzémbre pasàrt zo lüsnanen, ombrómm bar soin sichar ke bar bartn höarn ren no vil vo imen.

Ang