Una nuova sala giochi e di ritrovo per tutti i bambini di Luserna, dagli 1 ai 6 anni, è stata inaugurata pochi giorni fa nella Haus von Lusérnar, già sede della scuola del paese.
Nètt lai di Spilstube un Bibliotekh, ma est a sala durch in Haus von Lusérnar o. Di khindar vo Lusérn mangse sichar höarn fortunart zo maga håm drai plètz zo giana z’ spila un z’ stiana panåndar un – umbrómm nètt – zo lirna un zo reda azpe biar. “Disar iz ummandar von lestn stèpflndar zoa azta ‘z Haus von Lusérnar khemm ‘z soina a haus vor alle khindar von lånt”. Asó hatta khött dar Pürgarmaistar Luca Nicolussi Paolaz, balda in vorgånnate såntzta izta khent inaugurart da naüge sala von Prodjètt Ritroviamoci In Famiglia, sèmm bodada iz gest di paitstube von dokhtur. Disar iz dar bichtege prodjèkt hergestèllt von Toalkamou vodar Zimbar Hoachebene, pittar hilfe von Kamou un vodar Bibliotekh vo Lusérn, no vor a par djar un boda böllat az alle di laüt höarnse hèrta mearar ågihenkh in platz bosa soin gibortet un bosa lem. Disar prodjèkt iz khennt pensart daz mearaste vor di famildje boda håm khindar. In di lestn djardar defatti di laüt boda soin gånt vort von ünsar lånt soin gest hèrta mindar, umbròmm soinda khennt augilekk naüge plezt z’ arbata un åndre bichtege servitzi un asò vil laüt detzidarn z’ stiana da un zo giana nidar un au vodar statt. Eppaz boda hatt gemenglt finn est però, iz a platz boda di famildje un di khindar mangse vennen un stian panåndar. Est, disa naüge stube in boll khlumma ma dèstar un sichar un alle di khindar vo biane månat finn afti sèkhs djar mangda gian balsa bölln. ‘Z izta spila vor alle, edlane sachandar vor khlümmanarstn fin afti küchela, di trutn un di lego vor di gröazarstn. Inn in bågno sèmm dèllant izta an fasciatoio zoa azta di måmme mang dèstar bèkhlsn soine khindar un haltn saubar di sale. Est bartetaraz soin nå zo vorsa azta di laüt boda paitn in dokhtur mochan stian auz affon korridor! No, berda bill defatti mage gian inn in di sala von khindar, schümma gebèrmt. Ma bar gidenkhan ke palle dar ambulatordjo von dokhtur bart khemmen getrakk inn in Centro Multiservizi von Pön, sichar gröazar un dèstar.
Andrea Zotti
Vita Trentina, mercoledì 8 aprile 2015