Dar Rheo Martin Pedrazza iz gebortet atz Lusérn, zunginsel affon konfì zbisnen dar provìntz vo Tria un da sèll vo Vitzentz, atz 11 von bintmånat von djar 1924. In ditza khlumma lånt vo njånka tausankh laüt dar Martin geat in da untarschual, dena geatar ka Tria zo macha di industriàlnschualn.
Gesek ke dar pua iz gest asó bravat zo disenjara un zo vèrba soine armen eltarn håmen geschikht ’z djar 1937 zo lirna kan an paeså, dar Rudolf Nicolussi, boda, sa sidar ettlana zait hatt gelebet ka Poatzan un hatt gehatt offegetånt a bèrkhstatt.
’Z djar 1942 in laüt vo Lusérn khinten gevorst zo optara. Di famildja Pedrazza optart zo giana in Taütschlånt. Da gian durch Hallein, Linz un an lestn vennesa herbege a Stams nåmp Innsbruck in Tirol.
’Z djar 1943 dar pua khint gerüaft untar soldàdo pittar Wehrmacht. Gevånk machtar auz a zait in an fratzesegen lager.
Verte ’z kriage, in di djardar 1946/47 geatar in di Staatsgewerbeschule vo Innsbruck un von 1948 in di khunstschual vo Vièna. Verte zo lirna machtar in khunstlar un von 1964 vort lirntar er sèlbart disenjo inar obarschual.
In lem hattar gehaltet ettlane auzlegom, soi un pittnåndar pitt åndre in Europa. Soine khunstarbatn soin gehaltet in di Galleria Belvedere vo Viena in Landesmuseum Ferdinandeum vo Innsbruck in di såmmelung vodar Tiroler Landesregierung un vodar Raiffeisen RLB Landesbank, von Dokumentztionszentrum un von kamou vo Stams un in vil åndre vo privétt. ’Z djar 1982 lazztar vor hèrta zo vèrba un lekseda zo studjara un zo schraiba vo filosofia.
’Z djar 1988 machtar auzgian in libar pittar verlag SADUG vo Viena Nach- und vorgreifendes Denken aus drei Jahrzehnten un, 'z djar 1990, no pittar gelaichegen verlag, UnzeitmaBig-ZeitgemaBes boden hatt zuargezoget ettlane kritike vor soine idee afte natur von mentsch.
Von earstn djar 90 vort geatar zo leba a Stams bodaren aumacht in Pedrazzeum, machante von soi haus an museo pitt alln soin pildar afte maurn un åndre khunstarbatn pitt glass un åndre matardjéldar in gart. All ditza ena nia zo vorgèzza vo bo dar iz abegeståmpt; a månn von pèrng, a lusérnar.
Vor in groaz liap bodar hatt hèrta gehatt vor soi lånt hattar geschenkht in Dokumentationszentrum ’z haus bodar iz gest gebortet atz Lusérn un 35 pildar. ’Z haus haüt pittar schütz vodar Trianar un Südtirolar Redjon iz khent auzgerichtet un iz di Pinakotek boda trakk in nåm von kunstlar.